LAOAG CITY – Natakawan ti maysa a pagtaengan iti Barangay Buttong ditoy siudad ti Laoag.
Segun ken ni Mrs. Rogelina Castro, akinkukua ti pagtaengan, agarup 20 a ribu a pisos a kuarta ti naala ti maysa a babai a saan pay a nabigbig dagiti otoridad.
Inbatadna a posible a ginundawayan ti suspek a simrek iti kuartoda nga agasawa kabayatan nga adu dagiti gumatgatang iti tianggeda.
Inlawlawagna a naduktalanna laeng a natakawanda idi nariparna a kurang ti kuarta nga adda iti uneg ti bag-na.
Gapu iti daytoy, kunana a sinubliananda ti ala ti Close Circuit Television wenno CCTV camera a naimuntar iti tianggeda nga adda ti maysa a babai a kellaat lattan a simrek iti kuartoda.
Inpalgakna a saanda a mabigbig ti nasao a suspek gapu ta saanda nga am-ammo daytoy.
Innayonna nga adda ti pakabuklan a 150 a ribu a pisos a kuarta nga adda iti uneg ti bag-na ngem 20 a ribu pisos laeng ti innala ti suspek.
Kabayatanna, naammoan a daytoy ti umuna a daras a natakawan ti maseknan a pamilia.
