LAOAG CITY – Nakita ti maysa a mangngalap ti maysa a pakete a naglaon ti maipagarop a shabu nga agtatapaw iti baybay iti paset ti Sitio Cabaroan East, Brgy. Pasaleng iti ili ti Pagudpud.
Basar iti Philippine National Police iti ili ti Pagudpud, iti oras ti alas-10:30 itay bigat, Hunyo 16, 2025 ket napan nagkalap ti maysa a mangngalap a nabigbig a ni Mr. Lindbergn Leonador y Calipjo, naasawaan, agtawen ti 44 ken residente metlaeng iti nadakamat a barangay.
Naamoan a kabayatan ti panagkalap ni Leonador ket nakita na ti agtatapaw a maysa a pakete nga addaan ti markings ti durian a kas ti prutas, sumagmamano a Chinese characters, ken numero a 66.
Dagus nga innala ni Leonador ti pakete ken idi addan iti igid ti baybay ket iti nadakamat metlaeng a barangay ken idi linukatan da daytoy ket nakita da ti puraw a crystalline isuta gapuna nga insigida da nga inreport daytoy iti nakaduty a personnel iti regional border control point.
Mainaig iti daytoy, dagus a nangiwayat iti panagimbentaryo dagiti kameng ti Philippine Drug Enforcement Agency no sadinno a naduktalan a ti maysa a pakete ti maipagarop a shabu ket agdagsen ti maysa a kilo ken mapatta-patta nga agbalor ti P6.8-milyon a pisos.
Iti agdama ket naipasidong ti maipagarop a shabu iti Philippine Drug Enforcement Agency ditoy probinsya para iti proper disposition.
