Arig na naitantan ti panagladingit ti maysa a pamilya idiay Canada ken nasdaaw dagitoy gapo ta saan a ti miembro ti pamilya da a natay idiay Cuba ti naitulod a bangkay kadakuada.
Basar iti impormasyon, natay gapo iti heart attack ni Faraj Jarjour, maysa a Canadian citizen a Syrian descent, bayat nga adda iti Varadero beach iti Havana.
Kalpasan ti sumagmamano a lawas, nakigtot ti pamilya idi ti bangkay a naipan iti maysa a punerarya iti asideg ti Montreal ket maysa a lalaki nga addaan ti tattoo ken naub-ubing ti itsura na no ikumpara iti natay a kapamilya da.
Saan met a nalawag no siasinno ti bangkay a naipan kadakuada nga adda idiay Canada manipud Cuba.
Kabayatanna, inbatad ti foreign minister ti Cuba na ni Bruno Rodriguez a kinasarita na ti Canadian counterpart na a ni Melanie Joly seknan iti daytoy ken inawagan na nga “unfortunate incident.”
Gapo met iti napasamak, agur-uray manen ti pamilya ni Jarjour iti isasangpet ti bangkay manipud Cuba.
