LAOAG CITY – Nakita a maysan a nalamiis a bangkay ti lalaki iti Barangay San Lorenzo ditoy siudad ti Laoag.
Ti biktima ket agtawen ti 45, awanan asawa, tubo iti Quezon City ngem agdama nga agnanaed iti nasao a barangay.
Segun ken ni P/Lt.Col. Ryan Retotar, Hepe ti Laoag City Police Station, basar iti inisyal nga imbestigasionda, agarup 7:30 ti bigat, nakita ti karruba ti biktima nga awanen ti biagna a nakaidda iti uneg ti kuartona.
Gapu iti daytoy, insigida a nagkiddaw ti tulong kadagiti otoridad.
Mainaig iti daytoy, inpakaammo ti kaanakan ti biktima a sakbay ti insidente ket agsaksakit ti buksit ti biktima ken makapaspasar ti panag-vomit.
Nangiwayat dagiti imbestigador ti ocular inspection iti kuarto ti biktima no sadinno nga awan ti napukaw a kagamitanna.
Kuna ni Dr. Rodrigo Catcatan, mangidadaulo ti City Health Office ditoy siudad ti Laoag a basar iti post-mortem examination iti bangkay ti biktima nga awan ti pakalasinan a daytoy ket nadangran.
Innayonna a ti rason ti pannakatay ti biktima ket gapu iti cardiac arrest secondary to acute myocardial infarction.
Naammoan nga addan ti agarup uppat nga oras a natayen ti biktima sakbay a nakita daytoy.
