Nakabutbuteng nga aberya ti napasamak iti maysa nga air passenger apaman a nakadanun iti destinasyon na.
Daytoy ket kalpasan a sinaed dagiti otoridad iti erupuerto, pinagmulta da ti 200,000 New Taiwan dollar ($NT) wenno katukad ti P360,000 ngem idi saan a nakabayad ket dagus da nga inpadeportar.
Naamoan a ti rason no apay nga inaramid dagiti otoridad iti erupuerto ti nangdusa iti saanen a nabigbig a pasahero ket gapu ta nagbalon ti “roasted chicken ken pork combo”.
Basar iti report, ti pasahero ket maysa nga Indonesian national a nagbiyahe manipod Hong Kong agturong idiay Taiwan.
Inpakaammo ti Taiwanese Animal and Plant Health Inspection Agency a naduktalan ti balon ti pasahero nga adda iti plastic container gapu ta naangot ti quaratine dog.
Inkalintegan ti ahensya a naiget nga ipatpatungpal ti Bureau of Animal and Plant Health Inspection and Quarantine iti airport ti Taiwan dagiti kastoy a preventive measures tapno maliklikan ti pannakaiserrek ti African swine fever (ASF) iti pagilian kalpasan ti outbreak idiay China idi 2018.
Ti Taiwan ti maysa kadagiti sumagmamano laeng nga Asian countries a saan pay a naapektaran iti nasao a sakit.
