LAOAG CITY – Natakawan ti maysa a pasdek negosio iti Brgy. 41 Balacad ditoy siudad ti mapatta-patta a P65,000.00.
Segun iti Philippine National Police ditoy ciudad ti Laoag, ti biktima ket agtawen ti 44 ken residente iti Barangay Balatong ditoy ciudad idinto a dagiti suspek ket agtawen ti 18 a taga Brgy. 54-A, Lagui Sail; agtawen ti 18 a agnanaediti Brgy. 40, Balatong ken ti maysa nga adda iti legal nga edad.
Basar iti palawag ti biktima, mangiyuswat kuma ti sales inventory idi nadiskubre na a ti cash box a naglaon ti agarop 65 a ribo a pisos ket mapukpukaw.
Inbatad na a dagus na a napan kinita ti durabox na nga ayan dagiti lima a pitaka na a naglaon ti sumurok-kumurang lima ribo a pisos ket mapukpukaw met laeng.
Gapo iti daytoy, inreport kadagiti otoridad ken dagus met nangiyuswat dagitoy ti imbestigasyon ken kabayatan ti ocular inspection ket nakita da dagiti lima a pitaka nga adda iti pagbasuraan ken awanen ti karga na.
Kalpasan daytoy ket rineview da ti closed-circuit television footage a nakainstular iti pasdek negosyo ken naduktalan nga iti 11:58 ti rabii iti Mayo 28 ket maysa kadagiti suspek ti simrek ken innala na ti nagyanan ti kwarta ken dagus a pimmanaw.
Nakita pay dagiti otoridad iti footage ti maysa a kadua ti lalaki a simrek a makisarsarita kadagiti tattao nga adda iti pasdek idinto a ti maysa pay ket nagserbi a look out.
Mainaig iti daytoy, inpalgak ti biktima a sakbay ti insidente, dua kadagiti suspek ket napan gimmatang da ti merienda ken nagtugaw da dagitoy agingga a dimteng ti kadua da nga isu ti simrek iti pasdek.
Kabayatanna, naamoan a ti maysa kadagiti suspek wenno ti mismo a simrek ken nangala ti kwarta ket datin a natiliw gapo iti panaglabsingna ti Article 299 wenno Robbery iti Revised Penal Code ken naka-probation daytoy.
Iti agdama, agtultuloy pay laeng ti imbestigasion dagiti otoridad mainaig iti napasamak ken manamnamma a mapilaan ti kaso dagiti suspek.
