LAOAG CITY – Ginandat ti maysa a lalaki ti nagpakamatay babaen ti panagbekkel na kuma iti Barangay 15 iti ili ti San Nicolas.
Binigbig ti PNP ti nasao nga indibidwal a ni alyas “Gil”, agtawen ti 50, maysa a pintor ken agnanaed iti Sitio 6 iti nadakamat a barangay.
Basar iti impormasyon, itay parbangon ket ingalot ni Gil ti tengnged na ken immuli iti tuktok ti balay idinto a ti maysa a murdong ti tali ken ingalot na iti sanga ti puon ti avocado.
Naamoan a nabayag a nagtalinaed iti tuktok ti lalaki ngem babaen iti nangireport dagiti residente ken dagus a panagresponde ti PNP ken BFP ket balligi a naisalakan da ti maseknan no sadinno a ti damo ken nagresistir daytoy.
Kabayatan ti panangallukoy ken panagtrabaho dagiti nagresponde ket naregreg pay ti maysa a buneng ngem awan met ti nadangran.
Segun iti kabbalay na a ni Ms. Joan Ganotisi, maysa a BHW, 25 a tawenen nga agnanaed iti barangay da ni Gil ken nadlaw na idi rabii nga arig na adda ti problema ti lalaki idi nagubra ti construction firm iti ili ti Paoay.
Mainaig iti daytoy, kuna ni Police Lt. Godofredo Ribuyaco, deputy chief of police ti PNP-San Nicolas nga iti inisyal nga imbestigasyon da ket rumrumwar nga adda ti mangmangegan ni Gil a mapapatay daytoy.
Iti agdama, ti lalaki ket adda iti kustudyar ti PNP kalpasan a nagdesisyon ti kapitan ti barangay gapo ta amangan no uliten na ti gandat na a panagpakamatay.
