LAOAG CITY – Naireklamo ti maysa a pulis kalpasan a maipagarop a binastos na ti maysa a babai a pinautang na ti kuarta ditoy ciudad ti Laoag.
Nabigbig ti biktima a ni Mrs. Kristina Ancheta, idinto a ti maipagarop a nangbastos kenkuana ket ni Police Staff Sgt. Jonel Mangapit, ti desk officer iti PNP-Laoag.
Segun kenni Ancheta, adda ti P35 a ribo a pisos nga inted wenno intalek ni Mangapit kenkuana tapno ibirok na daytoy kadagiti kayat na iti umutang.
Mainaig ti daytoy, idi bolan ti Abril ket napan nagbayad ni Ancheta iti opisina ti PNP ngem gaputa adu ti tattao a mapan agreport ket nagtugtugaw daytoy ken nagur-uray angingga nga awanen dagiti tattao.
Inlawlawag ni Ancheta a bayat ti panangiyawat na ti kuarta ket dita a naaktwan na ni Mangapit nga agbuybuya ti ‘porn’ ket inpakita na daytoy kenkuana, ken kunana a no kayat na daytoy ket aramiden da met iti mabuybuya na.
Innayon na pay nga inbatad ti nasao a pulis kenkuana a naimas ti barukong na ket dita nga inaprusan na pay iti luppo na .
Gapu ti daytoy, napabutngan ni Ancheta ken saanen a nagpakpakita kenkuana, idinto a masansanen nga agtawtawag ti nasao a pulis ken agpangpangta a paltugan na daytoy tapno awanen ti problema na.
Inbatad ni Ancheta a gapu ti panagamak na ket inreklamo na daytoy iti PISKALYA, ket naikkan da ti gundaway nga agsarita iti Internal Affairs Office ngem saanen kayat ni Ancheta ti agpakita.
Kabayatana, iti text message nga inpatulod iti Bombo Radyo Laoag ni Mangapit ken inbatad na laeng ti “justice will prevail” ken agsarita da lattan ken ni Ancheta.
Nupay kasta, pursigido nga agpila ti kaso ni Ancheta kontra iti nasao a pulis.
