LAOAG CITY – Positibo ti naiyuswat a search warrant operation iti Barangay Juan iti ili ti Solsona babaen iti nagtipon a pwersa ti RDEU, PDEA, PDUE, Provincial Intelligence Unit ken PNP-Solsona.
Nabigbig ti subject a ni Mr. Richard Abadilla y Marcos, agtawen ti 34, maibilang a PWD ken residente iti nadakamat a barangay.
Nakailanad iti search warrant a biruken dagiti otoridad saan a madeterminar a kaado ti shabu iti ummuna a kadsaaran ti four-storey building.
Nakumpiskar iti pagtaengan ni Abadilla dagiti 20 a sachet a maipagarop a shabu, tallo a sachet ti mapapati a marijuana nga agdagsen ti 4.5 grams ken agbalor ti 1200 a pisos, caliber 38 a paltog nga addaan ti uppat a bala ken iti ruwar ti balay na ket adda ti walo a puon ti marijuana a nimula kadagiti dua a masitera.
Segun kenni Police Lt. Jackson Sugayen, ti Action Officer ti PDEU, nailista kas high value individual iti Regional level ni Abadilla ken miembro ti maysa a drug group.
Inbatad na a basar kadagiti naglabas a natiltiliwan da ket ni Abadilla ti intudo da a “bodegero” wenno ti agiduldulin kadagiti droga nga aggapo iti Manila.
Inlawlawag na a posible nga iti panangrugi ti lockdown no sadinno ket narigat ti panagibyahe iti droga ket nagpanunot ti suKat ti maipagarop a shabu rason a nagmula ti marijuana.
Patyen na a ti panagbalin a maysa a PWD ni Abadilla ket agserserbi laeng a “front” tapno saan a mapagatapan nga adda ti iligal nga aktibidad na.
Nupay kasta, kunana a saan a ti panagbalin a maysa a PWD ni Abadilla ti rason nga exempted daytoy iti panagsalungasig iti RA 9165.
Mainaig iti daytoy, inbatad na nga iti agdama ket manarimaan ti panangdeterminar da no siasinno ti mangiserserrek ti droga ken mangipan kenni Abadilla.
Manamnama met a mapilaan daytoy ti kaso a panaglabsing iti nagduduma a section iti RA 9165 ken RA 10591.
