LAOAG CITY – Inpakaammo dagiti agtagilako ti Vegetable Section ti maysa a dakkel a grocery store ditoy ciudad ti Laoag a nagkedkeden a nagpainagan nga awan ti kinapudno na ti maiwarwaras a tag price ti repolyo nga umabot iti 426.50 pesos ti presyo na.
Inlawlawag da a saan da a lako daytoy a repolyo nga addaan ti nangina la unay a presyo.
Inpasigurado dagiti adda iti Vegetable Section a saan a ti nasao a pasdek ti pakasapulan wenno paggatangan ti repolyo a maipagarup a mailaklako ti nangina a presyo.
Inpatangken da pay a maysa a pakalasinan a saan da a lako ti repolyo ket awanan daytoy ti nagan ti produkto iti Official Tag Price kas kadagiti produkto nga ilaklako da.
Naammoan a 46 pesos laeng ti presyo ti repolyo nga ilaklako ti dakkel a grocery store nga adayo nga amang no maidasig ti presyo a maiwarwaras iti social media idinto nga agarup 70-80 pesos kada kilo ti presyo ti repolyo iti merkado publiko.
