LAOAG CITY – Ilunglungalong ni Senador Erwin Tulfo ti maysa a gakat a gagem a mapagbalin a libre dagiti kangrunaan a professional licensure examinations para kadagiti kwalipikado a marigrigat a Pilipino, kas paset ti addang tapno mapalawa ti access iti propesyonal a trabaho ken makissayan ti underemployment.
Iti babaen ti Senate Bill No. 2035 wenno ti “Free Professional Examinations Act,” saanen a singiren ti examination fees dagiti kwalipikado nga indigent examinees para kadagiti board, civil service, ken bar examinations, kas maiyataday iti pagannurutan dagiti maseknan nga ahensya ti gobierno.
Segun ken ni Tulfo, ado dagiti Pilipino a a nakaturpos iti panagadal ngem saan da a naituloy ti panangala ti lisensya gapu iti kinakurang ti pagbayad da ti examination fees, isut gapuna a mapilitan da a sumrek a dagus ti trabaho saan pay a nagun-od ti propesyonal a kwalipikasyon.
Inpetteng ti senador nga agresulta daytoy ti pannakapukaw ti oportunidad kadagiti marigrigat a Pilipino a lumung-aw iti panagbiag ken manglimitar met ti bilang dagiti baro a licensed professionals iti pagilian.
Sakupen ti nailungalong a gakat ti Professional Regulation Commission (PRC) Board Examinations, Civil Service Commission (CSC) Eligibility Examinations, ken Bar Examinations nga iwanwanwan ti Korte Suprema.
Iti babaen ti gakat, ti maysa a “qualified indigent” ket establisaren ti Department of Social Welfare and Development (DSWD), nga isu ti mangisyu ti sertipikasyon nga ipresentar iti Professional Regulation Commission, Civil Service Commission wenno Korte Suprema kas pagibasaran ti exemption.
Tapno maliklikan ti pannakaabuso iti benepisyo, malimitaran ti panagusar iti daytoy iti maysa a daras iti kada tawen laeng para iti kada aplikante.
