LAOAG CITY – Inyestorya ni Ms. Alaine Dela Cruz iti ili ti San Nicolas ti maipagarup a pannakabastos na iti uneg ti dakkel a mall babaen iti maysa nga empleado ti massage parlor.
Segun ken ni dela Cruz, napanda iti dakkel a mall tapno sunduen ti anak na a naaddaan ti film viewing iti uneg.
Kuna na nga apaman nga adda iti batog ti elevator ket dita nga adda ti nagsardeng ti babai a masahista kageddan ti panangipakita na ti middle finger daytoy.
Inbatad ni dela Cruz a kalpasan dayta ket nangayab pay ti kadua na ti masahista kageddan ti panangitudo daytoy iti direksyon na.
Gapu iti daytoy, kuna ni dela Cruz a naklaat iti inaramid ti masahista ken arig a nabastos ti kinatao na ken awan ti ammo na a basol na iti daytoy.
Inpakaammo na a gapu iti sakit ti nakem na ket nagturong iti security office ti dakkel a mall ken nagsango da iti maseknan na masahista.
Kuna na a saan a dagus nga inadmitir ti masahista ti inaramid na ngem kalpasan a nagkiddaw ti footage iti CCTV tapno mapeneknekan ti inaramid na ket dita nga inadmitir na a pudno nga intudo na ti “middle finger” na kenkuana.
Innayun ni dela Cruz nga idi sinaludsod na ti masahista nu ania ti problema daytoy ket insungbat daytoy a gapu iti kabsat ken ikit na, banag nga awan ti pakainaigan na.
Immuna iti daytoy, inlawlawag ni dela Cruz a ti nasao a masahista ket ikit ti dati a ka-relasyon ti kabsat na ken dagitoy ti addaan ti problema saan ketdi nga isua.
Inpetteng na a mabigbig na ti masahista gapu kadagiti kapamilya da nga addaan ti dati a relasyon ngem awan ti gundaway a nagpinpinnulapol dagitoy.
Kuna ni dela Cruz a nakauniporme ti maseknan idi napasamak ti insidente ken adda iti duty iti massage parlor a pagpapaayan na.
Inbatad na a saan koma a makiramraman ti masahista iti problema ti ikit na kangrunaan ti pannakairaman da a kapamilya ti kabsat na a dati a karelasyon daytoy.
Kabayatanna, nagkedked pay laeng a mangited ti detalya ti dakkel a mall a lokasyon ti pagpaayan a massage parlor ti maak-akusaran a masahista seknan iti nasao nga insidente.
