LAOAG CITY – Target ti House Prosecution Panel a mangipasango ti sumuruk-kumurang a 25 a testigo it umas-asidegen nga impeachment trial kontra ken ni Vice President Sara Duterte iti Senado.
Segun ken ni House Lead Prosecutor ken Batangas 2nd District Representative Gerville Luistro, saan pay a mabalin nga upublikar ti nagan dagiti testigo gapu ta manarimaan paylaeng ti pannakaipadalan da iti vetting process.
Nupay kasta, inbutaktak ni Luistro a karaman kadagiti testigo ket dagiti opisyal manipod iti Department of Education (DepEd) ken Office of the Vice President (OVP).
Nupay kasta, gapu iti kinasinged da iti bise presidente ket namnamaen ti panel ti kinapudno dagitoy isut gapu na a mapaawagan dagitoy iti babaen ti rules of evidence kas dagiti “hostile witness.”
Maipalagip a kadagiti naisayangkat a clarificatory hearing ti House Committee on Justice, maysa kadagiti kangrunaan a nagtestigo ket ni Ramil Madriaga, a nagpabigbig a dati nga aide ken maipagarop a bagman ti Bise Presidente.
Simmango pay iti panagdengngeg ni Anti-Money Laundering Council (AMLC) Executive Director Ronel Buenaventura, a nangireport mainaig iti naduktalan na a ₱6.7 bilyon a balor dagiti maipagarop a mapagduduwaan a bank transactions da Vice President Sara ken ti asawa na a ni Atty. Manases Carpio manipod 2006 agingga iti 2025.
Malaksid kadakuada, nangipresentar pay dagiti ebidensya dagiti opisyal ti National Bureau of Investigation (NBI), iti panangidaulo ni Director Melvin Matibag, karaman dagiti panangarisit da kadagiti authenticated video, dagiti acknowledgment receipt, ken dagiti naduktalan a detalye mainaig iti nagbalin a pangta ti bise presidente.
