LAOAG CITY – Kwinestionaran ni Senador Jinggoy Estrada ti maipagarup nga alisto a panag taray ti kaso a sangsangoen dagiti miembro ti majority ti Senado kagiddan ti sangsangoenna a kaso a plunder ken graft mainaig iti flood control scandal.
Segun ken ni Estrada, naobserbaranna nga immalisto ti pannakaipila ti sangsangoen a kaso dagiti majority bloc sipud nagsukat ti liderato ti Senado idi Mayo 11 kalpasan a sinukatan ni Senador Alan Peter Cayetano ni Senador Vicente “Tito” Sotto III a kas Senate President.
Naipila pay dagiti kaso kontra kadagiti sumagmamano a Senador nga isuda Sen. Chiz Escudero, Sen. Joel Villanueva ken Senador Rodante Marcoleta.
Iti baet daytoy, inpila ti Ombudsman nga awan ti nairekomendar ti piyansa iti kaso ni Estrada a naisubmitir iti Sandiganbayan mainaig daytoy ti alegasion a maipagarup nga immawat isuna ti P573 million kickback manipud kadagiti proyekto iti flood control.
Naiget a naglikudan ti Senador dagiti pammabasol ken inpettengna a nakasagana daytoy nga agusar ti amin a legal remedies tapno sungbatan dagitoy.
Inbatadna nga adda dagiti ebidensia a maipagarup a saan a naikkan ti umdas nga importansia pakairamanan ti surat manipud iti Senate Legislative Budget Research and Monitoring Office (LBRMO) a mangibagbaga nga awan ti inaramidna a budget insertions iti 2025 national budget.
Inpaganetget ni Estrada a maipagarup a saan a naikkan isuna ti umdas a panawen a tingitingen dagiti resolusion ti Department of Justice ken Ombudsman sakbay a naipila ti kaso nga adda ti epekto iti karebbenganna iti due process.
Inpetteng pay ti senador nga itultuloyna nga ikalintegan ti naganna ken biroken ti kunapudno iti babaen ti umno a legal a proseso.
