LAOAG CITY – Inpasigurado ni Barangay Chairwoman Delia Cristobal iti Barangay Mangato-A ditoy ciudad ti Laoag a mangiyuswat da ti imbestigasyon seknan iti maipagarop a panaglibas ti maysa a residente manipud iti nakalockdown a pagtaengan.
Daytoy ket kalpasan nga adda ti dimmanon ditoy Bombo Radyo Laoag nga adda ti maipagarop a residente a naglibas manipud iti nakalockdown.
Segun kenni Cristobal, ammoen da no siasinno ti maipagarop a naglibas nangruna ket mangitunda daytoy iti panagamak dagiti kabarangayan da.
Inbatad na a posible a no nagawiden dagiti agbanbantay ket isu met ti panagruwar ti maseknan nga indibidual.
Kunana pay nga awan met ti dimmanon kenkuana a report seknan iti daytoy a banag isut gapo na a nakigtot kageddan ti pannakadismaya na gapo ta arig na ket awan ti pakaibanbanagan ti panagsakripisyo da nga agbanbantay.
Naamoan nga iti agdama ket adda ti tallo a pamilya iti barangay da ti mabanbantayan kalpasan nga adda dagiti sumagmamano a miembro dagitoy ti nagpositibo iti covid-19.
Mainaig iti daytoy, kunana a no adda ti kasapulan dagiti residente a nakalockdown ket nakasagana met dagiti barangay officials a mangited.
Kabayatanna, nagballaag ni Cristobal kadagiti kabarangayan na nangruna kadagiti pagtaengan a nakalockdown a saan da a rumrumuar.
