LAOAG CIY – Pimmusay ti maysa a senior citizen iti Brgy. Juan iti ili ti Solsona kalpasan a naaksidente a naitudok ti kannawan a paset ti rupana iti iking ti galba ti kulangan dagiti dingwenna.
Nabigbig ti biktima nga agtawen ti 67, lalaki ken residente iti nadakamat a lugar idinto nga agmamaysa daytoy nga agnanaed iti pagtaenganna no sadinno nga adda ti ballasiw-taaw ti asawa ken anakna.
Segun ken ni Pol/Cpt Randy Damo, chief of police iti Philippine National Police iti ili ti Solsona, nakita dagiti karruba ti biktima nga agabgabut daytoy ti ruot bayat a nakatugaw iti batog ti galba a kulangan dagiti tarakenna.
Basar iti naisayangkat nga imbestigasion ket natakuatan nga adda dara ti baro a galba a nakasugatan ti biktima.
Innayonna ni Damo a basar iti post-mortem examination iti biktima, nagsagaba daytoy iti nauneg a sugat ket awan ti makita a nagbalin a foul play ti pannakaaksidente ti biktima.
Nupay kasta, awan ti plano ti pamilya ti bikima a mangiyuswat pay ti naun-uneg nga imbestogasion mainaig iti pannakapusayna.
Naammoan a ti mismo biktima ti nagkiddaw ti tulong kadagiti karrubana a maitaray daytoy iti balay pagagasan.
Kabayatanna, nagpalagip ni Damo kadagiti residente iti ili ti Solsona nga agananad nangruna ita a panawen ti panagtutudo tapnu maliklikan ti ania man nga aksidente ken desgarasia.
