LAOAG CITY – Nagsagaba iti traumatic brain injury ti driver ti tricycle gapu iti napasamak a desgrasya iti bypass road iti paset ti Barangay Tangid ditoy ciudad ti Laoag.
Nabigbig ti drayber ti tricycle a ni Virginio Andres Bartolome, agtawen ti 64, naasawaan, ken residente iti nadakamat a lugar.
Basar iti inisyal nga imbestigasyon ti Philippine National Police, nag-overtake ti tricycle iti kasarsaruno na nga Honda Vios ngem saan na a narukod ti distansya na iti nadakamat a lugan a nangitunda met iti pannakasapgud na iti ligay ti kotse.
Gapu ti napigsa nga impact ti imanmaneho na a tricycle ket naitupar ti ulo ti biktima.
Mainaig iti daytoy, dagos met a naitaray ti biktima iti Mariano Marcos Memorial Hospital and Medical Center iti ciudad ti Batac para iti naan-anay a pannakataming na.
Kabayatanna, agtultuloy pay laeng ti imbestigasyon ti Philippine National Police Traffic Division seknan iti daytoy nga insidente.
