LAOAG CITY – Nabirukanen dagiti otoridad ti maysa kadagiti dua a flight data recorder wenno blackbox ii nagsuek ti Air India passenger plane.
Basar iti civil aviation minister, nakitada ti blackbox iti crash site iti Ahmedabad.
Agtultuloy ti panangbirukda ti maysa pay a blackbox iti nasao a lugar.
Rinugianen dagiti imbestigador manipud idiay United Kingdom ken Estados Unidos ti panangtingiting tapno maammoan ti namunganayan ti aksidente.
Nangisayangkat dagiti residente ti panagsindi kadagiti kandela iti lugar kas pannakipagladingit kadagiti biktima.
Dumanon iti walo nga indibidual ti natay iti lugar no sadinno a nagsuek ti eroplano idinto a naiteden iti pamilia dagiti biktima ti innem a bangkay kalpasan a nabigbig dagitoy dagiti kabagianda.
Maipalagip a kellaat lattan a nagsuek ti Air India sumagmamano a minuto kalpasan a nag-take off nga agturong idiay London.
Iti 242 a pasahero a nakalugan iti eroplano ket maysa laeng ti nakalasat a maysa a Briton a ni Vishwashkumar Ramesh.
Immuna iti daytoy, personal a binisita ni Indian Prime Minister Narendra Modi ti lugar no sadinno a nagsuek ti eroplano.
