LAOAG CITY – Nagreport iti PNP-San Nicolas ti maysa a babai kalpasan a dinanog ti mismo a kabsar na gapo iti papeles ti balay ken daga.
Nabigbig daytoy a ni Nonita Coloma, agtawen ti 58, naasawaan idinto a ti suspek ket ni Lorenzo Madamba, agtawen ti 63, naasawaan, agpada a residente iti Brgy. 9 iti nasao nga ili.
Segun ti report, napan ni Madamba iti pagtaengan ni Coloma ket ditoy a dawdawaten na ti papeles ti balay ken daga.
Gapo iti daytoy, timpuar ti nabara a panagsinnungbat a nangitunda tapno danugen ti suspek ti rupa biktima a nagresulta ti pannakasugat ti agong ti babai.
Mainaig iti daytoy, kuna ni Coloma a masansan nga ar-aramiden ti suspek kenkuana iti daytoy a banag.
Naamoan a dinanog pay ti suspek ti maysa a lalaki a naganawa iti pasamak.
Kabayatanna, maisagsaganan ti maipila a reklamo kontra iti nasao a suspek.
