LAOAG CITY – Nagballigi dagiti kameng ti Philippine National Police (PNP) iti inyuswat da a drug buy-bust operation idiay Barangay Pasngal, Bacarra, Ilocos Norte.
Nabigbig ti suspek a ni Jun-Jun Zuniga, addaan iti umno a tawen ken residente iti Barangay Bani ti nasao nga ili.
Malaksid iti maysa a sachet a naglaon ti maipagarop a shabu nga inlako ni Zuniga ket adda pay iti 3 a babassit a sachet a naglaon met laeng ti maipagarop a shabu, maysa a kaha ti sigarilyo nga adda karga na a maysa nga stick a sigarilyo, dua a cellphone, maysa a pocket wifi, ken ti 500 a pisos a marked money.
Mainaig ti daytoy, kinumpirmaran ni Zuniga a daytoy ket dati a drug surrenderer iti ili a Bacarra.
Inadmitir na a mapan na koma alaen ti droga nga ipapautang ti agnagan ti John Vincent Aguinaldo ngem sakbay a nakadanun ti pagkitaan da ket dimmagas a gimmatang ti sigarilyo ken ditoy metten a tiniliw dagiti pulis.
