LAOAG CITY – Manamnama a mapilaan ti reklamo a panagrames ti maysa a lalaki a taga upper Surong valley iti ili ti Vintar.
Nabigbig ti suspek iti alyas a Lee-R, addaan iti umno a tawen, addaan iti live-in ken residente iti Bgy. 32 Cabangaran iti nadakamat nga ili.
Segun iti PNP-Vintar, ti biktima nga agtawen iti 16 ket kinuyog a mismo ti ina na tapno ireklamo da ti nasao a supek.
Daytoy ket kalpasan a madlawen a masikog.
Iti pakpakauna nga imbestigasyon ti pulisya, rumrumuar a napasamak ti maipagarup a panagrames idi Marso 5 iti daytoy a tawen iti mismo a balay ti aunty ti biktima.
Maipagarup a napan ti suspek iti ayan ti biktima gapu ta birbiruken na ti uncle na ngem idi saan na a mabirukan ket ti nakita na ket ti biktima, dita a maipagarup a ginuyod na daytoy nga inserrek ti kuwarto ket inaramid na ti kaykayat na.
Maipagarup a pinangtaan ti suspek ti biktima a no agipulong ket papatayen na ti balasitang.
