LAOAG CITY – Nagtalinaed iti Mariano Marcos Memorial Hospital and Medical Center idiay ciudad ti Batac ti maysa a menor de edad kalpasan ti aksidente a pannakapaltog kenkuana ti pada na metlaeng a menor de edad.
Daytoy ti kinumpirman ni Police Senior Inspector Christ Anthony Sorsano, ti chief of police iti ili a Dingras.
Segun ken ni Sorsano, natamaan ti buksit ti biktima kalpasan ti aksidente a pannakapaltog kenkuana ti menor de edad babaen ti maysa nga airgun.
Inbatad ni Sorsano a basar ti doctor iti nasao nga ospital, boluntaryon to latta a rumuar ti nailumlum a crystal metal iti bagi ti biktima.
Inlawlawag ni Sorsano a nagtalinaed iti DSWD ti suspek a menor de edad idinto nga iyur-uray da ti agbalin a desisyon dagiti nagannak ti biktima no ania ti aramiden da kalpasan ti napasamak.
Innayon na a basar ti palawag ti suspek, napidot na laeng ti airgun ken possible nga inay-ayam da daytoy kadagiti pada na met laeng a menor de edad, pakairamanan ti biktima a nangitunda ti napasamak nga insidente.
Agtultuloy ti imbestigasyon ti PNP tapno maamoan no siasinno ti agtagikua iti nasao nga airgun ken no ayan nan ti nasao a paltog.
