LAOAG CITY – Umabot ti 50 a ribo a pisos ti naitaray dagiti dua a suspek iti budol-budol manipud iti maysa nga empleado ti gobierno iti paset ti ili ti San Nicolas.
Nabigbig ti biktima a ni Cristine Mae Bayanggos y Mirasol, agtawen ti 31, naasawaan, empleado ti gobierno lokal ti ciudad ti Batac ken residente iti Barangay Lacub, Batac ken dagiti suspek ket da Jocelyn Martinez a maipagarop nga adda iti ili ti Dingras ken ni Roseann dela Cruz a taga probinsya ti Mindoro.
Segun kenni Bayanggos, nagdamag dagiti suspek no sadinno ti paggatangan ti herbal medicine ken idi naibaga iti drug store ket insungbat met dagitoy nga awan ti lako.
Inbatad na a kalpasan daytoy ket indiaya ni Martinez ti kwintas nga agbalor ti 79 a ribo a pisos ken ilako na laeng daytoy iti balor a 20 a ribo a pisos tapno makaawid ti masikog a ni Dela Cruz idiay Mindoro gapo ta saan a kayat a takderan ti nakasikog nga agnagan ti Mr. Robert Ocampo.
Inlawlawag na a kalpasan ti panagsasarita da ket saan nan a napuutan ti napaspasamak agingga a napan da iti fast food chain ket naited na ti kwarta nga agbalor ti 30 a ribo a pisos ken dagiti nakasuot kenkuana nga alahas.
Kunana nga idi napan iti pawnshop ket ditoy a naduktalan na a peke ti alahas a nagatang na ken idi agsubli iti nakakitaan na kadagiti suspek ket awanen dagiti maseknan.
Gapo tii daytoy, nagpanawagan iti publiko nga agalerto ken saan a mamati a dagus kadagiti agpatpatulong gapo ta amangan no mapasamak met ti napadasan na.
Kabayatanna, Agtultuloy ti imbestigasyon dagiti otoridad iti napasamak a pannakabudol-budol ti maysa nga empleado ti ciudad ti Batac.
Daytoy ti inbatad ni Police Chief Inspector Paul Benedict Parado, chief of police ti PNP-San Nicolas.
Segun kenni Parado, makikoordenar da iti PNP-Dingras gapo ta nadakamat ti biktima a taga-Dingras ti maysa kadagiti suspek.
Mainaig iti daytoy, binalakadan ni Parado ti publiko a no mapagdudwaan ti kasarita a tao ket rumbeng a saanen nga i-entertain tapno maliklikan ti nasao a pasamak.
Inbatad na a mabalin a ditoy ti pamunganayan ti pannakabiktima ti bidol-budol wenno babaen iti nasayaat a saritaan.
Nagpanawagan pay iti publiko nga agalerto nangruna iti umasideg a pannakawambak ti paskua gapo ta mabalin nga agraira dagiti manglimlimo kasta met iti posible a panagwaras kadagiti peke a kwarta.
