LAOAG CITY – Kinamat-kamat dagiti kameng ti Philippine National Police ditoy siudad ti Laoag ti driver ti kotse iti Ermita Street a sakupen ti Brgy. 29.
Daytoy ket kalpasan a nagprobokar daytoy ken dinangran na dagiti kameng ti pulisya.
Segun iti Philippine National Police ditoy siudad ti Laoag ti suspek ket agtawen ti 41 ken residente iti Bgry 22.
Basar iti imbestigasyon, adda ti nagtawag a concern citizen iti kwerpo ti pulisya nga agprobprobokar ti suspek iti uneg ti pagtanegan da.
Apaman ti panagresponde dagiti otoridad, ket insigida met a timmalaw ti suspek ken natakuatan a binukbukan ti gasolina dagiti kurtina ken tugtugaw iti uneg ti pagtaenganda.
Sumagmamano laeng nga oras, nagsubli ti suspek iti pagtaengan da ken nagprobrokar manen daytoy.
Gapu iti daytoy, idi ginandat nga arestaren dagiti otoridad ti suspek ket saan a bimmaba daytoy iti nagluganan na a kotse ken kellaat nga inatrasan na dagiti kameng ti pulisya a nangitunda ti pannakasugat ti sumagmamano kadakuada agingga a naglibas manen ti suspek.
Inlawlawag ti PNP Laoag nga apaman a nakamat da ti suspek ket ditoy napilitan da nanglukat iti ridaw ti kotse no sadinno a nakumpiskarda ti dua a bote iti arak a saan pay a nalukatan ken 1 a bote a nagawangan met laeng ti arak.
Iti agdama nagtalinaed iti kuerpo iti PNP Laoag ti suspek ken manamnama a pilaan dagiti otoridad ti kaso nga Attempted Murder Dis-Obience to Person and Authority.
Kabayatanna, naamuan a selos ti gapu na no apay a nagprobokar ti maysa a lalaki ditoy ciudad ti Laoag.
