LAOAG CITY – Natay ti maysa nga indibidual kalpasan a napaltu-paltogan iti paset ti Barangay Tabtabagan, iti ili ti Banna.
Nabigbig ti biktima a ni Isaac Casay wenno ad-adda nga amammu iti palayaw na a “Bigso”, agtawen ti 54, residente iti Barangay Poblacion 1 iti ili ti Adams ngem agdama nga agnanaed iti Barangay Sto. Niño, iti ili ti Nueva Era.
Segun ken ni P/Cpt. Ashley Cacayorin iti Philippine National Police iti nasao nga ili, agarup 2:20 ti malem idi nakaawat da ti report nga adda maysa nga indibidual a naka-idda iti kalsada a sukupen ti Barangay Tabtabagan nga inmmuna nga inpagarupda a nadisgrasya.
Kunana a saan pay a masisinunuo no mano ti tama ti biktima ngem pinasingkedan ni Cacayorin nga adu dagiti timmama iti nagduduma a paset ti bagi ni Casay nangruna iti ulo na.
Gapu iti daytoy, patien ni P/Capt. Cacayorin a saan laeng a maymaysa ti suspek iti pammaltog gapu ta adda tallo a paltog a nausar; maysa a calibre 45, calibre 9mm, ken M16 riffle.
Malaksid iti daytoy ket nakarekobre pay dagiti kameng ti pulisya ti maysa a kapsula ti M16, 11 a kapsula ti Cal. 45, siyam a kapsula ti Cal. 9mm; idinto a narekobre met manipud iti biktima ti maysa a motorsiklo a TMX 125 nga agmaris ti nangisit, ken maysa a Calibre 45 a naglaon iti pito a bala.
Innayon ni Cacayorin nga awan ti makita da a senyales a limmaban ti biktima.
Kabayatanna, kitkitaen pay laeng dagiti otoridad ti posibilidad a pakainaigan ti insidente kadagiti napalabas a shooting incident ditoy probinsya.
Maipalagip a ni alyas Bigso ket nagbalin a witness kontra ken ni dati a Mayor Marinette Gamboa iti ili ti Dingras, ngem nagikkat isuna iti grupo da.
Iti agdama, mannarimaan metten ti panang-review da kadagiti CCTV footage a naglasatan ti biktima tapno maamwan dagiti posible a suspek iti insidente.
