LOAG CITY – Inbatad ni Sen. Panfilo “Ping” Lacson nga awan ti probative value-na dagiti imparuk-at nga impormasion ni dati a Sen. Antonio Trillanes IV mainaig iti impeachment case kontra ken ni Vice President Sara Duterte.
Idi laeng Biernes, nangiwayat ti press conference ni Trillanes no sadinno imbutaktakna dagiti manamnama koma a testimoniana iti Senate impeachment court.
Napasamak daytoy kalpasan ti pananganunsio ti House prosecution team a saandan nga ipasango ni Trillanes kas testigo iti alegasion mainaig iti saan a mailawlawag a kinabaknang ti bise.
Nupay kasta, inlawlawag ni Lacson a kas maysa a senator-judge, awan ti epektona ti nasao a press conference iti korte.
Kabayatanna, karaman kadagiti imputaktak ni Trillanes ti alegasion a sumurok P319 million a naawat ti CALE88 Foods Corp., maysa a kumpanya a maisilsilpo iti asawa ni Duterte a ni Atty. Manases Carpio, manipud iti gobierno ti China ken kadagiti kumpanya manipud iti pagilian a China.
