LAOAG CITY – Nabirukanen a bangkay ni Mark Wency Rebaula, agtawen iti 23, maysa nga umel ken residente iti Barangay 4 ditoy ciudad ti Laoag iti baybay a sakop iti Barangay Metro Lapaz.
Segun ken ni Police Inspector Norman Pentang, ti chief investigator iti PNP-Laoag, nakita dagiti mangngalap ti agtatapaw a bangkay ti biktima.
Innayon na a mismo a ti pamilya ti biktima ti napan nangbigbig ti bangkay ni Rebaula.
Immuna ti daytoy, nagresponde dagiti personnel iti PS-PAC iti Gilbert Bridge kalpasan nga adda ti nakita a maysa a pares ti tsinelas ken nangisit a bagpack.
Iti panangkita dagiti maseknan iti uneg ti bag ket nakita da ti ID ni Rebaula isut gapuna a dagus da a napan inpakaammo ti pamilya na.
Inkarigatan dagiti otoridad a biniruk ni Rebaula ngem saan da a nakita.
Rumrumuar a nagtalaw ni Rebaula iti balay da kalpasan nga inungtan na ti ama na a ni Ronnie Bal Ignacio Rebaula, agtawen iti 44 gapu ti panagaw-awid na ti rabii.
