LAOAG CITY – Ipilaan ti PNP San Nicolas ti kaso a panagsalungasing iti R.A. 10591 wenno illegal possesion of fire arms and ammunitions ni Lowi asalvador, maysa a retirado a seaman, ken residente iti Bgy. 4 iti nasao nga ili.
Kuna ni P/Chief Insp. Ryan Retutar, Chief of Police iti nasao nga ili, iti laksid nga ibagbaga ti suspek a napidot na laeng dagiti bala ti kalibre 22 ken kalibre 38 ket ipilaan da latta ti kaso.
Patien ni Retutar a dagiti naala iti pagtaengan ni Salvador ket kukua na ken iduldulin na a saan ketdi a napidot na laeng a kas palawag na iti innuman ti Bombo Radyo.
Maipalagip nga itay bigat ket ballaigi a naiwayat ti search operation babaen ti PNP-San Nicolas, CIDG, SWAT ti INPPO iti pagtaengan ti suspek a nakaalaan da iti 3 a bala ti kalibre 22 long rifle, 2 a bala ti kalibre 22 magnum ken 3 a bala ti kalibre 38.
Ti linaon ti Search Warrant nga iparuk-at ni Hon. Judge Conrado ragucos iti RTC Branch 16 iti ciudad ti Laoag ket paltog a maipagarup nga ir-iruar ti suspek no adda kagura na wenno kariri na a dagitoy ket kalibre 38, 357 ken kalibre 22.
