LAOAG CITY – Natay ti maysa a lalaki ken nasugatan dagiti dua a kakadwa na kalpasan ti napasamak a desgrasya iti paset ti Brgy. Suba iti ili ti Paoay.
Nabigbig ti natay a ni Roderick Labii idinto a nasugsugatan ti drayber a ni Jerold Domingo ken ti kadwa da pay a ni Daryll Bungcayao, agpapada da a residente iti Brgy. Nagbacalan iti nasao nga ili.
Segun iti inisyal nga imbestigasyon, bayat nga agpapaabagatan a direksyon ti nagluganan dagiti biktima ket liniklikan da ti masabat da a truck a nangitunda ti desgrasya.
Inlawlawag ni Edwin Domingo, ama ti driver, basar ti palawag ti anak na ket saan a dagus a nagpaigid ti masabat da a truck a isut gapu na nga isu da ti nagpaigid ngem kellaat a nagbal-baliktad ti nasao a lugan.
Dagus met a naitaray iti ospital dagiti biktima gapu kadagiti sinagaba da a sugat iti nagduduma a paset ti bagi da.
Inbatad met ti PNP a nakainom ti nasanger dagiti biktima ken maipagarop a napaspas ti panagpataray ti driver a rason ti saan na a pannaka-kontrol ti manibela a nangitunda ti desgrasya.
