LAOAG CITY – Maysa ti natay ken maysa ti natukkol ti saka na kalpasan a naidungpar ti nagluganan da a motorsiklo ti nakaparada a forward truck idiay Brgy Gabut Norte, Badoc, Ilocos Norte.
Nabigbig ti natay a biktima a ni Luis Macayanan y Bal, agtawen iti 43, naasawaan, driver ti motorsiklo idinto a ti inlubbon na a natukkol saka na ket ni Arnel Andag y Lidora, agtawen iti 33, awanan ti asawa agpada dagitoy a laborers ken residente iti Brgy. Boanga, Pinili, Ilocos Norte.
Segun ti imbestigasyon, bayat nga agpapaa-amyanan a direksyon dagiti biktima ket aksidente a naidungpar da ti nakaparada a truck nga inturong ni Joel Ortega y Lapay, agtawen iti 44, naasawaan ken residente iti Brgy Muson, San Jose del Monte, Bulacan.
Rumrumuar a napardas ti taray ti motorsiklo idi madesgrasya dagiti maseknan.
Naamoan a natay a dagus ti driver ti motorsiklo idinto a ti inlubbon na ket natukkol ti saka ken naitaray daytoy iti Mariano Marcos Memorial Medical Center idiay ciudad iti Batac.
Agtultuloy ti imbestigasyon dagiti otoridad mainaig ti napasamak a desgrasya.
