LAOAG CITY – Inbatad ni Mrs. Angie Ansagay, ti presidente ti Chenbaro iti Laoag City Public Market and Commercial Complex a ti pannakaapektar ti panaglako da ti kangrunaan a rason no apay a kalikagom da a meat vendors a maisardeng ti pannakailako kadagiti imported meat.
Segun kenni Ansagay, dagiti agsangpet nga imported meat ket nalaklaka no ikumpara kadagiti ilaklako da nga isu ti pakaapektaran da.
Gapo iti daytoy, idanon da kenni Mayor Michael Marcos Keon ti kalikagom da a pannakaisardeng ti panaglako kadagiti imported a karne.
Patien ni Ansagay nga addan ti makaanay a suplay ti karne ti baboy ditoy probinsya a para kadagiti aggatang.
Mainaig iti daytoy, kunana a kumarkaro ti sitwasyon nga ad-adda a gatangen ti publiko ti imported meat gapo ta nalaklaka no ikumpara iti fresh meat a lako da.
Maipalagip a ti imported meat ket isu ti nangalay-ay iti suplay ti karne iti kallabes gapo iti pannakaapektar ti probinsya iti African Swine fever.
