LAOAG CITY – Ginutigot ti dua a lider ti Kamara ti Philippine National Police (PNP) a kitaen ti mental fitness dagiti adda iti babaenda kalpasan a nangipeksa ti nakaro a pungtot ni Patrolman Francis Steve Fontillas iti pannakaarestar ni dati a Presidente Rodrigo Duterte.
Iti panagkita ni House Assistant Majority Leader Zia Alonto Adiong ti Lanao del Sur, masapol a mangipatungpal ti epektibo nga addang ti Philippine National Police tapno maammoan ti psychological capacity ti agkalikagum nga agbalin a pulis gapu ta malaksid a maikkanda ti paltog ket nadagsen pay ti responsibilidad dagitoy.
Inpetteng met ni Deputy Majority Leader Paolo Ortega V ti La Union a rumbeng ang ipangpangruna ti Philippine National Police, National Police Commission pakairamanan ti Armed Forces of the Philippines (AFP) ken dadduma pay a kapada nga ahensia saan laeng iti pisikal a kabaelan dagiti baro a pulis wenno miembroda no di ket mental a kasasaad.
