LAOAG CITY – Nagtalinaed a maysa ti pannakatagiben ti nasayaat a salun-at kadagiti kangrunaan a prayoridad ti gobierno probinsial.
Naisayangkat ditoy probinsia iti nasapa a paset ti agdama a bulan ti Agosto ti “Mental health and psycho-social support training” a napauloan ti “life in a facilitative environment: a suicide prevention, intervention and post-vention seminar”.
Segun ken ni Mrs. Divine Sevilla, mangidadaulo ti Speak-up I’m Here, ti mangipamatmat a pursigido ti gobernador iti kalikagumna a maaddaan ti nasayaat a salun-at dagiti umili.
Inlawlawagna a naipatungpal ti nasao a tignay babaen iti pannakikammayet ti opisinada iti Psychological Association of the Philippines.
Inbatadna nga umabot iti limapulo ket walo (58) dagiti nakipartisipar iti nasao nga aktibidad a naisayangkat iti Amici Resort ditoy siudad ti Laoag.
Inbunannagna a maibilang ditoy dagiti presidente ti Barangay Health Workers iti nagdumaduma a Local Government Units wenno LGU’s, City/Municipal Social Welfare and Development Officers, dagiti pannakabagi ti Parola Sanctuario, Inc., dagiti adviser ti Psychologist Society manipud ti Mariano Marcos State University ken ti Northwestern University, Guidance staff ti Divine Word College of Laoag, Guidance coordinator iti dua kadagiti kadadakkelan a High School ti siudad ti Laoag a nangibagi iti Department of Education – Laoag City pakairamanan dagiti staff ti Acute Psychiatric Unit ti Mariano Marcos Memorial Hospital and Medical Center ken ti Speak Up, I’m Here.
Inlawlawagna a naisentro ti seminar iti kinapateg ti mental health pakairamanan ti pannakailawlawag ti stress, common disorder mainaig iti panagpakamatay, no ana dagiti mental health condition a pasaren ti maysa a tao a mangitunda iti pannakapanunutda nga agpakamatay, ania dagiti rason no apay nga adda dagiti makaaramid ti kastoy, ania dagiti balikas a mabalin a mausar tapno ti maysa a tao ket saanna a marikna a mahushusgaran ket mariknana ti suporta, pannakaseknan ken maipapaayan ti kunsiderasyon.
Kinuna ni Sevilla nga adu a napapateg a banbanag ti naiyadal kadakuada pakaseknan ti pannakapasayaat ti nainpanunutan a salun-at.
Inpalgakna a naiyammo pay kadakuada nga adu dagiti mabalin a maaramid tano maliklikan ti panagpakamatay.
Kabayatanna, mangnamnama ni Sevilla nga iburay dagiti partisipantes dagiti naadalda kadagiti bukud dagitoy a lugar wenno gunglo tapno ad-adu pay dagiti agtitinnulong para iti pagsayaatan ti nainpanunutan a salun-at dagiti kakailian.
