LAOAG CITY – Nagkamali ti maysa a meter reader ti panangbasa na ti metro ti kuryente ti maysa a member-consumer owner.
Segun kenni Acting General Manager Perry Martinez iti Ilocos Norte Electric Cooperative, 3,000 laeng ti baybayadan ti member-consumer owner iti kada bolan, ngem nakigtot gapu ta 150 ribo a pisos metten ti rimwar iti billing statement.
Nupay kasta, kuna ni Martinez a pinakawanna ti meter-reader ken inikkan na ti gundaway tapno aramiden na a naimbag ti trabaho na.
Inbatad na a kinasaritana a nasayaat ti meter reader tapno saanen a maulit daytoy.
Kunana a dagitoy dagiti banag a masapol nga ipalagip kadagiti empleyado gapu ta awan ti perpekto a tao.
Maipalagip a mannarimaan paylaeng ti panangurnos ni Martinez kadagiti saan a napintas a napaspasamak iti kooperatiba pakairamanan dagiti panagtakaw ti kuryente, saan a pannakairehistro dagiti us-usaren da a gadget dagiti meter reader, ken dagiti pondo iti retirement benefit plan.
