LAOAG CITY – Insigida a nagsubli iti panagay-ayam ti volleyball ni Creamline opposite spiker Michele Gumabao sumagmamano nga aldaw kalpasan ti panagkallaysana ken ni Aldo Panlilio.
Balligi a nagmartsa ti Creamline iti quarterfinals ti Premier Volleyball League (PVL) All-Filipino Conference kalpasan nga inabakda ti Nxled.
Gapu iti daytoy, nagbalin a doble ti selebrasion daytoy para ken ni Gumabao.
Kunana nga arig saan pay a nag-sink in kenkuana a nagkasardan ti asawana.
Inbatadna a walo a tawen ti relasionda sakbayda a nagkasar.
Inlawlawagna nga ibilangna a saan pay a finish line ti biagda nga agasawa no di ket baro manen a yugto iti biagda.
Innayonna a magagaran isuna a mangbukel ti bukudna a pamilia kaduana ni Panlilio pakairamanan ti pannakainayon ti apelyido a ‘Panlilio’ iti jersey-na.
