LAOAG CITY – Naragsak nga inpakaammo ni Ms. Shey Pia Abaya, mangidadaulo ti Public Employment Service Office ditoy siudad ti Laoag a maisayangkat iti kada bulan ti Mini Job Fair iti Laoag City Hall.
Segun kenkuana, adda ti tallo agingga uppat laeng a kompania ti akomodaren ti opisinada.
Inbatadna a dakkel a tulong daytoy aglalo ket naruay kadagiti umili ti agbirbirok ti trabahona.
Inlawlawagna a malaksid iti mini job fair ket addanto pay ti maiyuswat a job fair kagiddan iti panangselebrar iti Ablan Day inton Agosto 6 iti pannakibinnuligda iti Department of Labor and Employment ken Department of Social Welfare and Development.
Kabayatanna, gutgutigoten ni Abaya dagiti umili nga agbirbirok ti trabaho a gundawayan daytoy nga oportunidad.
