LAOAG CITY – Nagtalinaed a maag-agasan ti maysa a kameng ti Philippine Navy iti Black Nazarene Hospital kalpasan a natamaan ti bala ti kalibre 45 ti bukod na a bagi bayat nga adda iti uneg ti Mall iti San Nicolas, Ilocos Norte.
Nabigbig daytoy a ni Joneil Averilla y Dela Cruz, agtawen ti 38, naasawaan, maysa a miembro ti Philippine Navy a nakabase iti Fort Bonifacio, Taguig City ken residente iti Brgy. Barong iti ili a Dingras.
Kadua ni Averilla ti pamilya na a nagturong iti nasao a Mall ken idi ideposito na ti paltog na ket kellaat a pimmutok a nakasugatan ti akin-kannawan a luppo na.
Dagus a naitaray iti ospital ti biktima kalpasan ti insidente idinto a ti paltog ket adda iti kustudiyar iti otoridad.
Ti inisyal nga imbestigasyon ti PNP San Nicolas, posible nga adda ti naka-load a bala iti paltog ni Averilla.
Kabayatanna, saan met a nakaalarma kadagiti tattao nga adda iti uneg ti nasao a Mall ti nasao a pasamak.
