LAOAG CITY – Inpakaammo ni Mr. Jhey-ar Mangati ti Health Education ken Promotions Officer ti Mariano Marcos Memorial Hospital and Medical Center iti Siudad ti Batac a nangrugin ita nga aldaw ti panagbakuna dagiti maibilang nga essential frontline workers ken dagiti immunocompromised individuals para iti booster shots.
Segun kenkuana, dagiti maikonsiderar nga essential frontline workers ket dagiti adda iti first responders wenno dagiti firefighters ken police personnel, iti benneg ti edukasion ket dagiti mangisursuro, support staff ken daycare employees, iti benneg ti agrikultura ket dagiti agtrabtrabaho iti meatpacking facilities ken food-processing plants pakairamanan dagiti grocery store workers ken dadduma pay.
Inbatadna a saan laeng a ditoy Ilocos Norte ti nangrugin nga agbakuna kadagiti nadakamat a maseknan no di ket pakairamanan pay iti biang ti Nasional kas paset ti gagem ti Gobierno a maiyalisto a mabakunaan dagiti dadduma pay a Pilipino sakbay nga agngudo iti daytoy a tawen.
Kunana nga adda pay dagiti volunteers manipod kadagiti nagduduma a sektor tapno agtitinnulong ken mangsuporta iti pannakagun-od ti herd immunity ditoy probinsia.
Kabayatanna, inpakaammona pay nga umabot iti 1,660 doses ti nausar iti panagbakuna kadagiti nakipagpaset iti naisayangkat a massive 3-Day Bayanihan, Bakunahan – National Vaccination banag a dakkel a tulong tapno ad-adda nga ad-adu dagiti mabakunaan kontra iti COVID-19.
Innayonna a basar iti kaudian a datos ti ospital ket umabot metten ti 38,124 COVID-19 vaccine doses ti naitudok kadagiti nga eligible recipients ditoy probinsia sipod idi Marso 6 iti agdama a tawen.
