LAOAG CITY – Kalikagom ni Brgy. Kagawad Olympio Bajado iti Brgy. 47, Bengcag ditoy ciudad ti Laoag nga iti kabiitan a panawen ket maiyakar ti poste nga adda iti tengnga ti kalsada.
Segun kenni Bajado, nabayagen a concern daytoy dagiti kabarangayan na gapo iti amak da a magitunda ti desgrasya.
Inlawlawag na a nangaramid da idi ti resolusyon ken insubmitir da iti opisina ti Ilocos Norte Electric Cooperative ken rumrumuar nga inbatad ti kooperatiba a masapol nga agbayad ti Barangay Bengcag ti nasurok 81 a ribo a pisos ngem ti problema ket awan iti pondo ti barangay.
Inbatad na nga idi nagturong agiti kameng ti Ilocos Norte Electric Cooperative iti barangay da para iti panangilawlawag ti singir ti kuryente, indanon dan ti concern da seknan iti poste ken naibaga iti konseho nga agaramid manen ti resolusyon ngem agpapan ita ket saan da pay a nakaaramid gapo iti ado a pakakumikoman da.
Dinakamat pay ni Bajado a nagprisintar ti kapitan da nga agbayad iti magastos laketdi maibaba daytoy, tapno laeng maiyakar ti poste iti tengnga ti kalsada.
Kunana a kalpasan daytoy ket adda ti nakasarita na nga inhinyero iti kooperatiba ken naibaga ti maseknan kenkuana a personal da a mapan makisarita kenni General Manager Bing Agdigos para iti kalikagom da a pannakaipababa ti magastos nga isu ti aramiden da iti sumarsaruno nga aldaw.
Mainaig iti daytoy, sipud idi naipalawa ti kalsada idi Pebrero ita a tawen ken naibaga kadakuada a maiyakar ti poste ngem agpapan ita ket saan pay a naaramid. Kabayatanna, plano ti kagawad a pintaan pay laeng ti poste tapno malasin ken saan a mangitunda ti desgrasya.
