LAOAG CITY – Naelektaran kas baro a presidente ti Regional Public Employment Service Office Federation – Region 1 ni Miss Shey Pia Abaya.
Ni Abaya ti agdama nga Assistant manager ti Public Employment Service Office ditoy ciudad ti Laoag.
Segun kenni Abaya, maragsakan iti pannakaelektar na kas baro a presidente ti Public Employment Service Office Federation – Region 1.
Kuna na a ti nanginominar kenkuana ket ti Public Employment Service Officer iti San Ildefonso, Ilocos Sur ken dagiti nangipaay ti suporta kenkuana ket manipod Ilocos Sur ken La Union a nangitunda iti opisyal a panangabak na kontra iti kinalaban na manipod iti probinsiya ti Pangasinan.
Inbatad na a mangrugi ti termino na intono 2026 agpatingga iti 2028.
Ibilang ni Abaya ti pannakaelektar na iti nasao a posisyon kas nakapinpintas a pasamak gapo ta maaddaan isuna ti wagas tapno maipakita ti kabaelan na a mangidaulo iti nalawlawa a sakop.
Inpakaammo na a bayat ti panagtakem na ket inpasingked na nga itultuloy na dagiti narugyan ti agdama a presidente ti pederasyon ken kalikagum na a papigsaen pay ti panagbibinnulig dagiti amin Public Employment Service Office managers iti Region 1 iti amin a gannuat tapno alisto da a magun-od dagiti kalikagum da.
Inbatad na pay a buloden na ti tagline ni Mayor James Bryan Alcid nga “Alisto Asenso Progreso” gapo ta patien na a no alisto ti panagtignay ket ad-ado dagiti programa a maiyimplementar.
Inpanamnama na nga aramiden na daytoy saan laeng nga iti Region 1 no di ket nangnangruna ditoy ciudad ti Laoag.
Nagyaman met ni Abaya kenni Mayor Alcid iti naiget a suporta na iti opisina da ken patien na a babaen iti daytoy ket al-alisto da a magun-od dagiti kalikagom da para iti intero a ciudad ti Laoag.
