LAOAG CITY – Nagun-od ti Municipal Agriculture and Fishery Council ti ili a San Nicolas ti Outstanding Award kabayatan ti Search for Outstanding Saka Achievers Award a naiwayat idiay San Fernando, La Union.
Mainaig iti daytoy, napalaos ti panagyaman ni Mrs. Norma Calamayan Municipal Agriculturist ti nasao nga ili gapu iti pammadayaw nga inda naawat.
Segun ken ni Calamayan, gapu ta iti napalabas a bulbulan ket adu dagiti didigra a simangbay iti probinsia a narway a nakaperdian dagiti sumagmamano a mula a pagay ken nakatayan dagiti nagduduma a taraken a nangted kadakuada ti dakkel a karit nu kasano iti alisto a wagas a pannakaipaay ti tulong kadagiti mannalon.
Kabayatanna, inpasingked na nga agtultuloy iti napintas a pannakaipaay ti serbisyo ken tulong kadagiti agtaltalon nangnangruna ti pannakaipaay dagiti supply a pagkasapulan iti benneg ti panagtalon.
