LAOAG CITY – Inlawlawag ni Municipal Engr. Benny dela Cruz iti ili ti Dingras a ti panaglayos iti panalabas gubway ti bagyo Ineng ti rason ti pannakaperdi ti dadduma a paset ti Flood control project iti Barangay Parado iti nasao nga ili.
Inbatad na nga idi maiprograma ti proyekto ket adayo ti ayos ti danom iti pakaipatakderan ti proyekto.
Nupay kasta, kukuna na nga idi manarimaanen a maar-aramid ti proyekto ket naglayos ken nagbaliw ti direksyon ti ayos ti danom ken tinupar na ti flood control project a nakadadaelan ti sumagmamano a paset na.
Kuna ni dela Cruz nga inrekomendar na a mabaliwan ti pagayusan ti danom a tumupar iti dike sakbay a matarimaan ti nadadael a paset na idinto a ti asideg kadagiti balbalay ket mapadakkel ti drainage outlet ken maibaba bassit tapno saan a maummong ti danom.
Innayon na a no mabalin ket maikkan pay ti alad na ken maiserra no dumakkel ti danom.
Daytoy ti nagbalin a palawag ni dela Cruz iti reklamo dagiti residente mainaig iti pannakadadael ti proyekto a mangituntunda iti pannakaummong ti danum a mabalin a pagumukan dagiti lamok a carrier iti dengue virus.
Kabayatanna, kinumpirmaran ni Engr. Matias Malenab iti 2nd Engineering District ti Department of Public Works and Highways (DPWH) a saan da pay a naited amin ti bayad ti contractor ti nasao a proyekto isut gapuna a masapol a tarimaanen da ti nadadael a paset na.
Inpasingked na met nga ibaon na dagiti inhinyero na tapno mapan da kitaen ti proyekto ken mangbiruk da ti mabalin a pagayusan ti danom tapno saan a maummong.
