LAOAG CITY – Kalikagum ti Gobierno Probinsial a mapapintas ken mapasayaat pay ti Museo Ilocos Norte.
Daytoy ket kalpasan nga inaprobaran ti Sangguniang Panlalawigan ti Draft Provincial Resolution No. 2022-02-455 a nakaipalaonan ti maiyuswat a Memorandum of Agreement wenno MOA a nagbaetan ti Gobierno Probinsial nga ibagian ni Gob. Matthew Marcos Manotoc ken ti Gameng Foundation Incorporated.
Segun ken ni Bokal ken Chairman ti Committee on Laws, Rules, Ethics and Privileges Atty. Da Vinci Crisostomo, ti nasao a pribado a sektor ket maysa a non-stock, non-profit corporation a gagem a maitultuloy ti pannakausar ti maibilang a Provincial Museum.
Inbatadna ti Museo Ilocos Norte ket mangiripripresentar ti tangible ken intangible cultural heritage kadagiti umili ditoy probinsia kas ti katukkong, malabi, alat, sugod, traditional clothing dagiti Ilokano ken indigenous cultural artifacts manipod iti daya ken abagatan a paset ti probinsia.
Kunana a babaen iti daytoy ket mapreserbar ti Isneg House, ulnas, karison, kalesa, dap-ayan, antique musical instruments, teatro ti museo, pugon, ancestral house, abel iloco ken dadduma pay a maipagpannakkel a kultura ken produkto ditoy probinsia.
Inlawlawagna a napintas daytoy nga addang ti hunta probinsial tapno ad-adda pay a magutigot dagiti kakailian pakairamanan dagiti turista tapno agpasiar iti nasao a museo ken maapresiar dagiti nagkakauna a kultura ditoy probinsia.
Innayonna a dakkel ti posibilidadna nga ad-adunton ti agturong iti Museo Ilocos Norte gapu iti pannakapapintas ken pannakapasayaat ti nasao a museo ken matulungan pay iti benneg ti turismo nangruna ket bumangbangon pay laeng iti sektor ti turismo.
