LAOAG CITY – Inadmitir ni Engr. Manuel Aurelio, ti Officer in charge iti city City Engineering Office ditoy siudad ti Laoag a nabayagen a problema iti nabangsit nga angot wenno naangseg a kalsada iti paset ti Brgy. 16 ditoy siudad partikular iti sango ti merkado publiko.
Kuna ni Aurelio a ti kangrunaan a rason iti nasao a problema ket gapu kadagiti natangken ti ulo na nga umili nga awan ti intensyon na nga umisbo iti cr.
Inbatad na nga adon a gundaway a nadaldalusan iti nasao a kalsada nu sadino a katulungan da ti BFP ditoy siudad ti Laoag.
Nu pay kasta, inbunannag na nga arig a maulit-ulit latta ti pasamak gapu iti kaawan ti personnel nga agbantay iti lugar.
Immuna iti daytoy, inpakaammo ni Aurelio a nu ti rabii ket nasipnget iti lugar rason a posible nga isu ti pangalistoan a pagisboan ti publiko.
Kabayatanna, kuna ni Aurelio a manamnama nga agkamang ken Mrs. Maylyn Pascal nga isu ti mangiddaualo ti CENRO ditoy siudad ken kalpasan na ket maipadanon ti nasao a problema ken ni Mayor Michael Marcos Keon sakbay a maikoordenar kadagiti ospisyal ti Brgy. 16 ken Committee on Community Affairs.
Innayun ti city engineer a ti kalikagum na pay ket maipatungpal a naimbag dagiti ordinansa maipanggep iti panangtagiben ti aglawlaw.
