LAOAG CITY – Natiliw ti maysa a barangay kagawad ken negosyante a babai iti Brgy. Camanga iti ili ti Badoc gapu iti kaadda ti relasyon da iti laksid nga addaan ti asawa ti lalaki.
Segun ken PMaj. Joseph Tayaban, hepe ti Philippine National Police Badoc, ti kagawad ket agtawen ti 50 idinto a ti negosyante nga isun ti live-in partner na ket agtawen ti 37 ken agpada dagitoy a residente iti nasao a barangay.
Inbatad ni Tayaban a natiliw dagiti dua babaen iti bileg ti warrant of arrest nga inparuk-at ti presiding judge iti municipal circuit trial court iti Badoc-Pinili gapu iti kaso a concubinage.
Inpakaammo ti hepe a namunganay ti pannakapila ti kaso iti barangay kagawad ken karelasyon na kalpasan a nagreklamo ti legal nga asawa na nga agtrabtrabaho kas domestic helper iti ballasiw taaw.
Nagtalinaed dagiti akusado iti kustodyar dagiti otoridad ken narekomendaran dagitoy ti 30,000 a pisos para iti temporaryo a pannakawaya-waya da.
