LAOAG CITY – Inlawlawag ni Atty. Donato Balderas, Schools Division Superintendent iti Department of Education-Ilocos Norte dagiti addang a mabalin a makatulong iti mental health dagiti agad-adal.
Inbatad ni Balderas nga adda ti pammilin na kadagiti amin a pampubliko a pagadalan iti probinsya a masapol a mangisayangkat da kadagiti nagduduma nga aktibidad, karaman ditoyen dagiti sports activities tapno isu ti pakaitutukan ti atensyon dagiti agad-adal.
Kuna na a kanayun ti panangmonitor da kadagiti isaysayangkat nga aktibidad dagiti pagadalan para iti pagsayaatan dagiti estudyante.
Innayon na a regular met ti panagreport dagiti school heads maipanggep kadagiti ar-aramiden da para iti agenda ti ahensya nga adda ti pakainaigan ti mental health issues ken mental health concern dagiti estudyante.
Inrakurak pay ni Balderas nga adda met ti programa ti Guidance Office nga idadaulwan ti Assistant Schools Division Superintendent, no sadinno nga agturong da kadagiti nagduduma a pagadalan tapno kataripnong da dagiti nagannak tapno ilawlawag dagiti isyu maipapan iti mental health.
Mainaig iti daytoy, nagyaman ni Balderas iti gobierno national para iti pannaka-hire dagiti school counselor associates iti intero a pagilian.
