LAOAG CITY – Inbatad ni Engr. Jake Casey Sugui iti Barangay 37, Calayab ditoy ciudad ti Laoag nga arigna tagtagainep pay laeng kenkuana ti pannakapasa na ti Agricultural and Biosystems Engineer Licensure Examination.
Daytoy ket gapu ta saan laeng a basta nakapasa no di ket nagbalin pay a top 10 iti nasao nga eksaminasyon gapu iti nagun-od na nga average nga 81.31%.
Inlawlawag na nga arigna saan pay a mamati a nakapasa gapu iti kinarigat ti eksaminasyon.
Ni Engr. Sugui ket nagturpos iti Mariano Marcos State University (MMSU) iti ciudad ti Batac.
Inpakaammo na a ti agbalin a trabaho ti innala na a kurso ket isuda ti mangiyaplikar ti nagduduma nga engineering principles ti agricultural life kas ti civil, structures ken sabsabali pay.
Innayon na a nalawa ti masakupan ti kurso na isut gapuna a narigat ngem ado dagiti mabalin na a pagserkan iti trabaho.
