LAOAG CITY – Ibilang ti Sarrat National High School a dakkel a pakaidayawan da a ti maysa kadagiti nagbalin nga estudyante da a ni Ma. Cassandra Reich Duque a taga Brgy. Lataag ditoy ciudad ti Laoag ket napagasatan a naikkan ti scholarship iti China University, Chen Zhen Campus.
Segun keni Ms. Marietta Yap, Principal iti nasao a pagadalan, ni Duque ket Top 1 iti Science High School Entrance Examination ken ditoy a nakitada ti talento ken kinasirib na.
Kuna ni Yap a babaen ti inisyatibo na ket nakisalip ni Duque ken dagiti dadduma pay nga estudyante iti Math Olympiad nga idi un-unana ket online laeng inggana a napanda Onsite.
Gapu iti daytoy, ibilang ni Duque a dakkel ti akem ken nagbalin nga instrumento ni Yap ken dagiti coaches ti da ti pannakagun-od da kadagiti naruay a pammadayaw ken ti scholarship na idiay Chen Zhen, China.
Inbatad na a sipud kinaubing na ket adon dagiti nakiparpartisiparan na nangruna iti Mathematics.
Inlawlawag na nga idi damo ket narikna na a naragsak iti panagsursuro na maipanggep iti Math agingga a nagbalinen nga hiligna daytoy agingga a naikkan da ti gundaway a napan nakilaban iti Thailand, Hongkong, ken Macau.
Kabayatanna, nagyaman ni Duque kadagiti narway a timmulong ken dagiti agtultuloy a tumultulong kenkuana.
