LAOAG CITY – Inpakaammo ni Agent Harry Cariño, ti Intelligence Officer II ti Philippine Drug Enforcement Agency (PDEA) a manamnama a dua ti maipila a kaso kontra ken ni Mrs. Marie Jane Clemente, ti asawa ti subject ti search operation a ni Mr. Villamor Clemente iti Barangay Vira ditoy ciudad ti Laoag.
Segun ken ni Cariño, malaksid iti obstruction of justice ket karaman pay a maipila ken ni Mrs. Clemente ti panaglabsing ti Section 11 wenno Illegal Possession of Dangerous Drugs iti babaen ti RA 9165 wenno Comprehensive Dangerous Drugs Act of 2002.
Maipalagip a naiparuk-at ti search warrant kontra ken ni Mr. Clement babaen iti Regional Trical Court Branch 11 ditoy ciudad ti Laoag ken nakailanad a ti masukimat ket shabu.
Nakumpiskar iti operasyon ti walo a sachet ti maipagarop a shabu.
Segun iti immuna a palawag ni Mrs. Marie Jane Clemente, manarimaan ti panagkape ti asawa na ken matmaturog met isuna idi maipagarop ng adda ti kellaat a simrek iti pagtaengan da rason a nagtaray ni Bobot.
Inbatad na a kiniddaw na kadagiti maseknan nga ipakita da ti search warrant ngem maipagarop a saan da nga inpakita ken pinarwar da daytoy iti pagtaengan da ken kinamat da ti asawa na.
Inpetteng na pay a nagkiddaw ti tulong ngem maipagarop a natutukan daytoy ti paltog.
Iti pannakaiyuswat met ti operasyon iti kwarto ket nagwala ni Clemente gapo ta nawara ti foam da a patien na a nagaraw daytoy ken idi kinita na ket adda ti maipagarop a sachet ti shabu a patien na nga inkabil dagiti simrek.
Gapo iti sakit ti nakem ket inpurwak na ti sachet ti maipagarop a shabu iti tawa ti pagtaengan da ken ti karaman kadagiti nakumpiskar ket saan nga isu ti inpurwak na.
Inpakammo na a ti asawa na ket dimmalan iti depresyon ken nabalod idin iti tallo a tawen ngem patien na a nagbalbaliwen daytoy.
Mainaig iti daytoy, inpetteng na nga awan ti iligal a droga iti pagtaengan da ken saan na nga ammo no sadinno ti naggapoan dagiti nakumpiskar.
Maluksaw met ni Clemente no apay a mapilaan ti kaso gapo ta patien na nga awan ti basol na.
Saan na met a masinunuo no anya ti rason a nagtaray ti asawa na nga iti agdama ket agtultuloy a mabirbirok.
