LAOAG CITY – Ad-adalen ti Department of Migrant Workers (DMW) ti inlungalong ni Sen. Raffy Tulfo nga ipatungpal ti pannakaipawil ti panagipatulod kadagiti Filipino domestic workers idiay Kuwait.
Dinakamat ni Tulfo, ti chairman ti Senate Committee on Migrant Workers ti pannakatay dagiti Pinoy domestic workers iti Kuwait kas kangrunaan a rason iti inlungalong na a pannakaipatungpal ti ban, ken ibilang na a ti gobyerno ti Kuwait ti agsungbat no adda ti risgo a sangwen dagiti migrant workers.
Segun ken ni Department of Migrant Workers Secretary Hans Cacdac, tututukan ti departamento dagiti suhestiyon ni Sen. Tulfo mainaig iti naig-iget a requirements sakbay a makapanaw dagiti pilipino nga agturong idiay Kuwait.
Nupay kasta, kuna na a saan a maapektaran dagiti Overseas Filipino Workers nga addan idiay Kuwait.
Iti agdama ket ipawil ti Department of Migrant Workers ti panagipatulod kadagiti first-time Overseas Filipino Workers idiay Kuwait ken mangipatpatungpal kadagiti addang kas ti whitelisting ken blacklisting kadagiti Kuwaiti recruiters, pre-departure briefings, ken electronic on-site monitoring.
Mapatta-patta nga adda ti 220,000 a Pilipino idiay Kuwait, no sadinno a 70% ket agtrabtrabaho kas domestic workers.
